រាជធានីភ្នំពេញ ៖ យុវជន៣នាក់ស្រវឹងជិះម៉ូតូឌុបគ្នាក្នុងល្បឿនលឿនជ្រុលទៅបុកផ្ទប់ចំហៀងផ្នែកខាង ឆ្វេងរថយន្តឡិចស៊ិស RX350 ពេញទំហឹង បណ្តាលឱ្យយុវជនទាំង៣នាក់រងរបួសបែកមុខបែកមាត់ ចំណែកម៉ូតូ និងរថយន្តរងការខូចខាតដូចគ្នា ។ ដែលហេតុការណ៍គ្រោះថ្នាក់ចរាចរណ៍នេះកើតឡើងនៅ ចំណុចទល់មុខនឹងច្រកចូលផ្សារស្ទឹងមានជ័យថ្មី ស្ថិតតាមបណ្តោយផ្លូវព្រះមុន្នីរ៉េត ក្នុងសង្កាត់ស្ទឹងមានជ័យ ខណ្ឌមានជ័យ កាលពីវេលាម៉ោង ១៩ និង ៣០នាទីយប់ថ្ងៃទី២៤ ខែធ្នូ ឆ្នាំ២០១៤ ។
តាមប្រភពពីកន្លែងកើតហេតុបានឱ្យដឹងថា នៅមុនពេលកើតហេតុ យុវជនជាម្ចាស់ម៉ូតូទាំង៣នាក់ខាងលើ បានជិះម៉ូតូមួយគ្រឿងម៉ាកឃ្លីក ស៊េរីឆ្នាំ២០១០ ពណ៌ខ្មៅ ពាក់ស្លាកលេខកំពង់ចាម 1F-0459 ជិះឌុបគ្នាតាមបណ្តោយផ្លូវព្រះមុន្នីរ៉េត ទិសដៅពីត្បូងទៅជើង ក្នុងល្បឿនយ៉ាងលឿន ខណៈមកដល់ចំណុចកើតហេតុស្រាប់តែវ៉ាក់អឺ ជាមួយនឹងរថយន្តមួយគ្រឿងផ្សេងទៀតម៉ាកឡិចស៊ិស RX350 ពណ៌ស មិនចាំស្លាកលេខ បើកបរចេញពីផ្លូវប៉េតុងច្រកចូលផ្សារស្ទឹងមានជ័យថ្មី ក្នុងល្បឿន ល្មម ធ្វើឱ្យភាគីខាងម៉ូតូជាន់ហ្វ្រាំងមិនស៊ី ក៏ជ្រុលទៅបុកចំពីចំហៀងផ្នែកខាងឆ្វេងនៃរថយន្តពេញ ទំហឹងបណ្តាលឱ្យយុវជនទាំង៣នាក់ ដួលបោកផ្ទប់នឹងរថយន្តរងរបួសបែកមុខបែកមាត់ រីឯម៉ូតូ និងរថយន្តត្រូវគៀបជាប់គ្នា រងការខូចខាតយ៉ាងដំណំ។
ក្រោយកើតហេតុសមត្ថកិច្ចមូលដ្ឋានបានចុះអន្តរាគមន៍ ធ្វើការសម្របសម្រួលភាគីទាំង២ ប៉ុន្តែ ដោយសារតែភាគីខាងម្ចាស់ម៉ូតូទាំង៣នាក់ខាងលើមិនអាចនិយាយចចារគ្នាបាន ព្រោះកំពុងស្ថិតក្នុង ស្ថានភាពស្រវឹងទើបសមត្ថកិច្ចសម្រេចធ្វើការទាក់ទងទៅសាច់ញាតិឱ្យមក ដោះស្រាយសំណងជូន ទៅខាងភាគីម្ចាស់រថយន្ត រួចបញ្ចប់រឿងនៅនឹងកន្លែងកើតហេតុភ្លាមៗ ដោយមិនឱ្យមានរឿងវែង ឆ្ងាយបន្តទៀត ។
Post a Comment