ហេតុការណ៍នេះកើតឡើងកាលពីវេលាម៉ោង ២ និង៤០នាទីរំលងអាធ្រាត្រ ឈានចូលថ្ងៃទី ២៤ធ្នូ ២០១៤ នៅចំណុចទល់មុខមន្ទីរពេទ្យរបេង ស្ថិតក្នុងសង្កាត់បឹងកេងកង២ ខណ្ឌចំការមន ។
បុរសរងគ្រោះឈ្មោះ កង ចេង ភេទប្រុស អាយុ២៣ឆ្នាំ រស់នៅផ្ទះលេខ៣០៦ ផ្លូវ២២០ ក្នុងភូមិដើមចាន់ សង្កាត់ច្បារអំពៅ២ ខណ្ឌចំការមន ជិះម៉ូតូម៉ាកហុងដាឌ្រីម សេ១២៥ ស៊េរីឆ្នាំ២០១៥ ពណ៌ខ្មៅ ពាក់ស្លាកលេខភ្នំពេញ 1CU-0544 ។
ប្រភពព័ត៌មានពីបុរសរងគ្រោះបានឱ្យដឹងថា មុនពេលកើតហេតុបុរសរងគ្រោះបានចេញពីធ្វើការនៅម្តុំមុខទូតកូរ៉េ ក្នុងខណ្ឌ៧មករា បន្ទាប់មកបានជិះម៉ូតូមកទទួលប្រពន្ធដែលចេញពីធ្វើការម្តុំពេទ្យរបេង ក្នុងខណ្ឌចំការមន ។
បុរសរងគ្រោះបានបើកម៉ូតូមកដល់ចំណុចកើតហេតុក៏បានឈប់ម៉ូតូបម្រុងចុះពីលើម៉ូតូ ភ្លាមៗនោះក៏លេចមុខក្រុមចោរប្រដាប់អាវុធមួយក្រុមមានគ្នា៤នាក់ជិះម៉ូតូហុងដាឌ្រីម អត់ស្គាល់ស្លាកលេខពីរគ្រឿងបានដកកាំភ្លើងអាមេ ភ្ជង់បុរសរងគ្រោះយកម៉ូតូហុងដាឌ្រីម សេ១២៥ ស៊េរីឆ្នាំ២០១៥ រួចនាំគ្នាជិះម៉ូតូគេចខ្លួនដោយសុវត្ថភាព ។
បុរសរងគ្រោះបានឱ្យដឹងទៀតថា ខណៈពេលដែលធ្វើដំណើរតាមផ្លូវក្រុមចោរបានធ្វើដំណើរតាមពីក្រោយខ្លួន តែខ្លួនមិនដឹងនោះទេដោយសារតែក្រុមចោរជិះម៉ូតូមិនបើកភ្លើង ។
ក្រោយពេលកើតហេតុបុរសរងគ្រោះបានទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលបឹងកេងកង២ ដើម្បីឱ្យសមត្ថកិច្ចជួយស្រាវជ្រាវរកម៉ូតូរបស់ខ្លួនត្រឡប់មកវិញ ។
Post a Comment