ខេត្តកំពង់ស្ពឺ ៖ ឈើប្រណីតចំនួន៣,៥តោន ដឹកតាមរយន្តកូរ៉េមួយគ្រឿង ដែលជារបស់យោធាភូមិភាគ៣ ត្រូវបានកម្លាំងកងរាជអាវុធហត្ថខេត្តកំពង់ស្ពឺ ធ្វើការបង្រ្កាបប្រគល់ឱ្យទៅខាងមេព្រៃចាត់ការតាមផ្លូវច្បាប់ ។
ការបង្រ្កាបនេះគឺបានធ្វើឡើងនៅវេលាម៉ោង១២ និង ១០នាទីរំលងអាធ្រាត្រ ឈានចូលថ្ងៃទី ២៤ ខែធ្នូ ២០១៤ នៅលើកំណាត់ផ្លូវជាតិលេខ៤ ស្ថិតក្នុងភូមិមនោរម្យ ឃុំហោងសំណំ ស្រុកឱរ៉ាល់ ខេត្តកំពង់ស្ពឺ ។
លោកអនុសេនីយ៍ទោ ទិត្យវណ្ណៈ នាយការរិយាល័យព្រហ្មទណ្ឌកងរាជអាវុធហត្ថខេត្តបានឱ្យដឹងថា ដោយមានបញ្ជាពីលោកវរៈសេនីយ៍ត្រី មេបញ្ជាការកងរាជអាវុធហត្ថ រូបលោកក៏បានដឹកនាំកម្លាំងចំនួន១៥នាក់ រថយន្តចំនួន៣គ្រឿង ចុះធ្វើការល្បាត ក៏បានប្រទះឃើញរថយន្តកូរ៉េមួយួគ្រឿងម៉ាក ហ៊ីយ៉ាន់ដាយពណ៌ស អត់មានពាក់ស្លាកលេខក៏បានឃាត់នៅចំណុចខាងលើ និងបានធ្វើការត្រួតពិនិត្យឃើញសុទ្ធតែឈើប្រណីតពេញមួយរថយន្ត ។
ក្រោយពីឃាត់រថយន្តខាងលើនេះភ្លាម តៃកុងរថយន្តបានបើកទ្វាររថយន្តរត់គេចខ្លួនបាត់ស្រមោល បន្ទាប់មកក៏ឃើញទាហាន២នាក់ ដែលម្នាក់គេស្គាល់ថាឈ្មោះ វណ្ណ វណ្ណៈ ពាក់សក្តិ៣ និង ម្នាក់ទៀតឈ្មោះ យឿង សារិន ពាក់សក្តិ៥ នៅភូមិភាគ៣។
ទាហានទាំង២នាក់ រួមជាមួយកម្លាំងទាហានជាច្រើននាក់ទៀតដែលប្រដាប់ដោយកាំភ្លើងបានជិះរថយន្តកាមរីស៊េរីឆ្នាំ៩៣ មួយគ្រឿង ពណ៌សំបកឪឡឹក ពាក់ស្លាកលេខភ្នំពេញ2A-7722 បានចុះមកពីរថយន្តហើយនិយាយថាឈើនេះជាឈើរបស់មេភូមិភាគ៣ ហើយពួកគេគ្រាន់តែជាអ្នកនាំផ្លូវតែប៉ុណ្ណោះ។
លោកយឿង សារិន បានឱ្យដឹងថាទំនាក់ទំនងរត់ការមិនបានដឹងទេ គឺឈ្មោះ វណ្ណវណ្ណៈ ជាអ្នករត់ការជាមួយឈ្មួញឈើ ហើយអ្វីដែលលោកដឹងគឺឈើទាំងនោះជារបស់ឈ្មោះវណ្ណៈ ហៅណាក់ស្រមូម មានទីលំនៅនៅភូមិថ្មី សង្កាត់ការធំ ក្រុងច្បារមន ខេត្តកំពង់ស្ពឺ ។
ក្រោយធ្វើការបង្រ្កាបកម្លាំងកងរាជអាវុធហត្ថបានប្រគល់ឈើប្រណីតទាំងអស់នេះជូនទៅខាងជំនាញរដ្ឋបាលព្រៃឈើសង្កាត់សង្កែសាទប ដើម្បីធ្វើការវាស់វែងនិងចាត់ការតាមនិតិវិធីស្តីពីព្រៃឈើ ។
គេនៅមិនទាន់ដឹងថាឈើប្រណីតដែលកម្លាំងកងរាជអាវុធហត្ថបង្រ្កាបបាននៅពេលនេះមានចំនួនប៉ុន្មានម៉ែត្រគូបនៅឡើយទេ ដោយរងចាំវាស់វែងជាក្រោយ ។
សូមបញ្ជាក់ផងដែរថា ក្នុងពេលបង្រ្កាបរថយន្តដឹកឈើប្រណីតសមត្ថកិច្ចបានដកហូតអាវុធម៉ាកAK 47 មួយដើម ជារបស់ឈ្មោះយឿង សារិន នៅជាមន្រ្តីយោធា ពាក់សក្តិ៥នៅភូមិភាគ៣ ។
Post a Comment