ខេត្តបន្ទាយមានជ័យ ៖ លោកវរសេនីយ៍ត្រីសួន នីប៉ូ នាយរងការិយាល័យចរាចរណ៍ខេត្តឱ្យដឹងថា បុរសម្នាក់ត្រូវគេប្រទះឃើញដេកស្លាប់ក្នុងថ្លុកឈាម និងស្ត្រីម្នាក់រងរបួសធ្ងន់ កាលពីវេលាម៉ោង០៦ និង៣០នាទីល្ងាចថ្ងៃទី២២ ធ្នូ ២០១៤ នៅលើកំណាត់ផ្លូវជាតិលេខ៥ ត្រង់ចំណុចស្រះដើមអំពិលទឹក ក្នុងភូមិទឹកថ្លា សង្កាត់ទឹកថ្លា ក្រុងសិរីសោភ័ណ ។
ប្រភពបានឱ្យដឹងថា បើតាមការចុះទៅពិនិត្យនៅកន្លែងកើតហេតុ ជនរងគ្រោះជិះម៉ូតូម៉ាកហុងដាវ៉េវ ពណ៌ខ្មៅ ពាក់ស្លាកលេខ បន្ទាយមានជ័យ ១F-៨៩០៥ ក្នុងទិសដៅពីលិចមកកើត ហើយត្រូវគេស្គាល់ឈ្មោះញៀន សាន អាយុ២៦ឆ្នាំ ចំណែកឯស្ត្រីរងរបួសធ្ងន់ឈ្មោះពៅ អាយុ២៣ឆ្នាំ ទាំង២នាក់រស់នៅភូមិថ្មសិន សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ ។
ទាក់ទិននឹងករណីខាងលើ សមត្ថកិច្ចបានដាក់ការសង្ស័យថា អាចជិះម៉ូតូទៅបុកគោយន្តកន្ត្រៃពីក្រោយពេញទំហឹង ទើបបណ្តាលឱ្យបុរសជាប្តីខ្ទាតចេញពីម៉ូតូបោកក្បាលទៅនឹងថ្នល់ផ្លូវជាតិបែកក្បាលស្លាប់ រីឯស្ត្រីជាប្រពន្ធរងរបួសធ្ងន់ដោយបានដឹកបញ្ជូនទៅព្យាបាលនៅមន្ទីរពេទ្យបង្អែកមិត្តភាពកម្ពុជា-ជប៉ុន នៅស្រុកមង្គលបុរី ។
ក្រោយពេលកើតហេតុ អ្នកបើកគោយន្តបើកគេចបាត់ ខណៈគ្មានមនុស្សធ្វើដំណើរទៅមក។ សពជនរងគ្រោះត្រូវបានកម្លាំងនគរបាលជំនាញធ្វើការស្រាវជ្រាវ និងហៅសាច់ញាតិមកទទួលយកសពទៅធ្វើបុណ្យតាមប្រពៃណី ។
Post a Comment