រាជធានីភ្នំពេញ ៖ យោងតាមសេចក្តីប្រកាសព័ត៌មានរបស់សាលាក្តីចេញផ្សាយនៅថ្ងៃទី១៩ ធ្នូ ២០១៤ បានឲ្យដឹងថា ពេលនេះ អង្គជំនុំជម្រះសាលាដំបូងនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) បានសម្រេចចេញដីកាបញ្ជូនកំហុសវិជ្ជាជីវៈរបស់មេធាវី គង់ សំអុន សហមេធាវីជាតិការពារក្តី ខៀវ សំផន ទៅប្រធានគណៈមេធាវីនៃព្រះរាជាណាចក្រកម្ពុជា និងបញ្ជូនកំហុសវិជ្ជាជីវៈរបស់មេធាវី Arthur Vercken និងមេធាវី Anta Guisse សហមេធាវីអន្តរជាតិការពារក្តី ខៀវ សំផន ទៅប្រធានគណៈមេធាវីទីក្រុងប៉ារីស និងអគ្គរដ្ឋអាជ្ញានៃសាលាឧទ្ធរណ៍ទីក្រុងប៉ារីស។
សាលាក្តីបានលើកឡើងថា ដីកាសម្រេចបញ្ជូននេះបានផ្តល់ព័ត៌មានលម្អិតអំពីកំហុសវិជ្ជាជីវៈរបស់ក្រុមមេធាវីការពារក្តី ខៀវ សំផន ចាប់ពីថ្ងៃទី១៧ តុលា ២០១៤ មក។ អង្គជំនុំជម្រះសាលាដំបូងបានយល់ឃើញថា ក្រុមមេធាវីការពារក្តីបានរំលោភបំពានលើដីកាបង្គាប់របស់តុលាការម្តងហើយម្តងទៀត ក្នុងការចូលរួមកិច្ចដំណើរការនីតិវិធីសវនាការនៅក្នុងសំណុំរឿង ០០២/០២ ដែលទង្វើនេះ គឺជាការធ្វើឲ្យរាំងស្ទះដល់កិច្ចដំណើរការនីតិវិធីយ៉ាងធ្ងន់ធ្ងរ និងដោយចេតនា ៕
Post a Comment