ខេត្តរនគិរី ៖ ចំនួញឈើប្រណីតនៅស្រុកអណ្តូងមាសចាប់ផ្តើមកម្រើកឡើងវិញហើយអ្នករកស៊ីសុទ្ធតែកម្លាំងកងប្រដាប់អាវុធ ហើយសព្វថ្ងៃនេះគេបានឃើញក្រុមឈ្មួួញជាច្រើននាក់កំពុងតែដឹកជញ្ជូនឈើប្រណីតតាមរថយន្តថុនត្រា តាគូម៉ា ឡង់គ្រីស័រ យ៉ាងគគ្រឹកគគ្រេង ចេញពីស្រុកអណ្តូងមាសយកទៅលក់នៅតាមច្រករបៀងបាសៅ ស្ថិតនៅក្នុងឃុំញ៉ាង ។
ក្រុមឈ្មួញរកស៊ីឈើទាំងអស់ត្រូវបានគេសង្កេតឃើញថាភាគច្រើនជាកម្លាំងប្រដាប់អាវុធដែលឈរជើងនៅស្រុកអណ្តូងមាសតែម្តង ។ ជាក់ស្តែងដូចជារូបភាពរថយន្តដឹកឈើម៉ាកថុនត្រា ពណ៌ខ្មៅ ផ្ទុកឈើប្រណីតមួយគ្រឿង ដឹកយកទៅលក់នៅច្រករបៀងខាងលើ ។ តាមប្រភពព័ត៌មានពីមន្រ្តីតូចតាចនៅសាលាស្រុកអណ្តូងមាសបានប្រាប់ឱ្យដឹងថា មេឈ្មួញរកស៊ីឈើប្រណីតខុសច្បាប់នៅស្រុកអណ្តូងមាសមានចំនួន៤នាក់ ដែលសុទ្ធតែជាកម្លាំងប្រដាប់អាវុធ អ្នកក្រីក្រ រកស៊ីមិនបានទេ ហើយឈើប្រណីតដែលកំពុងតែមានហាងឆេងនៅប្រទេសវៀតណាម គឺប្រភេទឈើធ្នង់ និង នាងនួន ដែលមានទំហំ១០ គុណ ៤០ ហើយនិង ១០ គុណ ៥០ ប្រវែង១.២តឹក។
ឈើប្រណីតទាំងអស់នោះក្រុមឈ្មួញដើរប្រមូលទិញតាមស្រុកតាវែង និង ស្រុកអណ្តូងមាស ដែលពួកឈ្មួញមានលុយច្រើនបានបញ្ជាឱ្យបក្ខពួកកាប់ក្នុងព្រៃសហគមន៍នានា ។នៅក្នុងរថយន្តមួយគ្រឿងឈ្មួញដឹកឈើប្រណីតពី៩០ ទៅ១០០សន្លឹកដែលស្មើនិង៣ម៉ែត្រគូប ដោយក្នុងមួយរថយន្តរត់ការឱ្យសមត្ថកិច្ចទាំងអស់ជាង១មឺុនដុល្លារនៅក្នុងមួយខែ។ ប្រជាពលរដ្ឋបានធ្វើការរិះគន់ថាសមត្ថកិច្ចថាគិតតែពីប្រមូលលុយដាក់ហៅខ្លួនឯងមិនគិតពីការហិនហោចធនធានធម្មជាតិនោះទេ ។
ប្រភពពី:កោះសន្តិភាព
Post a Comment