ចោរ៤នាក់ចូលលួចក្នុងផ្ទះគេកណ្តាលថ្ងៃ តែត្រូវម្ចាស់ទាន់ចាប់បាន២នាក់ ២នាក់ទៀតរត់រួច

.
រាជធានីភ្នំពេញ ៖ ក្រុមចោរគាស់ផ្ទះ៤នាក់ប៉ុនប៉ងធ្វើសកម្មភាពគាស់ផ្ទះប្រជាពលរដ្ឋនៅច្រកឌឿងហែមខាងក្រោយស្នាក់ការនគរបាលប៉ុស្តិ៍រដ្ឋបាលសង្កាត់អូរប្ញស្សី២ កាលពីវេលាម៉ោង៣ និង៣០នាទីរសៀលថ្ងៃទី២៨ ធ្នូ ២០១៤ តែត្រូវបានប្រជាពលរដ្ឋឡោមព័ទ្ធចាប់បាន២នាក់ ចំណែក២នាក់ទៀតរត់គេចខ្លួនបាត់ ។ ប្រភពបានឱ្យដឹងថា ជនសង្ស័យដែលត្រូវចាប់ខ្លួនបានម្នាក់ឈ្មោះប្រាំង វឌ្ឍនា អាយុ២៧ឆ្នាំ ជាកម្មករលីសែងផ្លែឈើ ស្នាក់នៅផ្ទះជួលម្តុំផ្សារនាគមាស ក្នុងសង្កាត់ផ្សារដើមគរ ខណ្ឌទួលគោក ជនរូបនេះទើបចេញពីពន្ធនាគារបាន៣ខែ ប៉ុណ្ណោះ ពាក់ព័ន្ធពីបទឆក់ ។

ចំណែកម្នាក់ទៀតឈ្មោះហាច ចាន់ អាយុ២៨ឆ្នាំ ស្នាក់នៅមិនពិតប្រាកដ ។ តាមសំដីជនរងគ្រោះឈ្មោះគឹម ប៊ុនឡេង ភេទប្រុស អាយុ២៤ឆ្នាំ ស្នាក់នៅផ្ទះលេខ៣១១E1 Z ផ្លូវលេខ២១៧ បាន រៀបរាប់ឱ្យដឹងថា កាលពីវេលាម៉ោងខាងលើ ខ្លួនទើបចេញពីរៀន ក៏ដើរឡើងទៅលើផ្ទះដូចសព្វដង ក៏ប្រទះឃើញសោទ្វារបើកចំហរ ។

ពេលនោះខ្លួនបានចូលទៅក្នុងផ្ទះ ស្រាប់តែជួបចោរ២នាក់នៅក្នុងនោះ បម្រុងលួចទ្រព្យ សម្បត្តិ ។ ឃើញដូច្នោះ ខ្លួនបានស្រែកចោរៗ ស្រាប់តែម្នាក់ស្ទុះរត់គេចខ្លួនចេញក្រៅចុះទៅក្រោម រីឯម្នាក់នៅ ខាងក្នុង ខ្លួនក៏បានទាញទ្វារបិទចាក់សោទុកម្តុំ ។

ជនរងគ្រោះបន្តថា ពេលចាក់សោទ្វារ ជនម្នាក់ជាប់នៅក្នុងផ្ទះ ហើយខ្លួនក៏បានចុះក្រោម ដើម្បីតាមចាប់ជនម្នាក់ទៀត តែជននោះត្រូវប្រជាពលរដ្ឋចាប់ប្រគល់ឱ្យទៅនគរបាលប៉ុស្តិ៍អូរឬស្សី២រួចទៅហើយ ។

ប្រភពពី:កោះសន្តិភាព