ខេត្តបន្ទាយមានជ័យ ៖ បុរសម្នាក់បានរងរបួសធ្ងន់ក្នុងអំពើហិង្សាមួយដែលបង្កដោយជនល្មើសម្នាក់ ប្រើកូនប្រុសអាយុ១២ឆ្នាំ រត់ទៅផ្ទះយកកាំបិតខ្វែវកាប់គ្មានញញើតដៃ រួចរត់គេចខ្លួនចូលទឹកដីថៃបាត់។ អំពើហិង្សានេះបានកើតឡើងកាលពីវេលាម៉ោង២ និង៥នាទីរសៀល ថ្ងៃទី២៣ ធ្នូ ២០១៤ នៅភូមិតាស្រី ឃុំគោករមៀត ស្រុកថ្មពួក ខេត្តបន្ទាយមានជ័យ ។
លោកវរសេនីយ៍ត្រី ដៀប ពេជ្រ មេបញ្ជាការរងវរសេនាតូចការពារព្រំដែនគោកលេខ៨០៧ បានឲ្យដឹងថា ជនរងគ្រោះក្នុងអំពើកាប់ប្រហារនេះ ឈ្មោះ អ៊ុក រ៉ា ភេទប្រុស អាយុ៤៨ឆ្នាំ នៅភូមិតាស្រី ឃុំគោករមៀត ស្រុកថ្មពួក ខេត្តបន្ទាយមានជ័យ ចំណែកជនដៃដល់ឈ្មោះភី គាក់ ភេទប្រុស អាយុ៥៨ឆ្នាំ នៅភូមិជាមួយគ្នា ។
លោកមេបញ្ជាការរងបានបញ្ជាក់ថា មុនពេលកើតហេតុ ជនល្មើសឈ្មោះ ភី គាក់ បានឈរនិយាយទូរស័ព្ទនៅក្រៅរបងមុខផ្ទះជនរងគ្រោះ ដោយស្រែកឮខ្លាំងៗ ពេលនោះជនរងគ្រោះបាននិយាយប្រាប់ថា «កុំសូវនិយាយឮខ្លាំងពេកកូនខ្ញុំកំពុងដេកក្រែងកូនខ្ញុំភ្ញាក់» គ្រាន់តែប៉ុណ្ណោះជនល្មើសនិយាយទៅកាន់ជនរងគ្រោះថា «អាហែងប្រយ័ត្នអញកាប់ងាប់» រួចបានប្រើកូនប្រុស របស់ខ្លួនអាយុ១២ឆ្នាំឲ្យរត់ទៅផ្ទះយកកាំបិតខ្វែវមកកាប់ត្រូវចំថ្ងាស១កាំបិតខ្វែវមុតជំរៅ០,៨សង្ទីម៉ែត្រ បណ្តាលឲ្យជនរងគ្រោះដួលដេកក្នុងថ្លុកឈាម បន្ទាប់មកជនល្មើសបានរត់ចូលទៅក្នុងទឹកដីថៃបាត់ ចំណែកជនរងគ្រោះត្រូវបានក្រុមគ្រួសារ និងអ្នកជិតខាងជួយដឹកទៅព្យាបាលនៅពេទ្យភូមិដេរជាច្រើនថ្នេរ ។
លោកមេបញ្ជាការរងបានបញ្ជាក់បន្ថែមថា ជនដៃដល់ កម្លាំងនគរបាលការពារព្រំដែនគោកលេខ៨០៧ កំពុងធ្វើការទំនាក់ទំនងជាមួយសមត្ថកិច្ចថៃដើម្បីតាមស្វែងរកចាប់ខ្លួនយកមកផ្តន្ទាទោសតាមច្បាប់៕
Post a Comment