ភ្នំពេញ៖ យុវជនម្នាក់បានរងរបួសធ្ងន់ធ្ងរ ត្រូវបានរថយន្តសង្គ្រោះដឹកទៅសង្គ្រោះនៅមន្ទីរទេព្យភ្លាមៗ ខណៈដែលកំពុងជិះម៉ូតូសង់កូរ៉េមួយគ្រឿង ធ្វើដំណើរឆ្លងផ្លូវត្រូវរថយន្តឡិចស៊ីស បើកក្នុងល្បឿនលឿនដូចហោះ បុកចំពេញទំហឹង កាលពីវេលាម៉ោង២៣និង៥០នាទីយប់ ថ្ងៃទី២៣ ខែធ្នូ ឆ្នាំ២០១៤ នៅចំណុចមុខស្ថានទូតវៀតណាម តាមបណ្តោយផ្លូវលេខ៤៣២ កែងផ្លូវមុន្នីរវង្ស ស្ថិតក្នុងសង្កាត់បឹងត្របែក ខណ្ឌចំការមន ហើយរថយន្តបង្កបានបន្តដំណើររត់គេចខ្លួនបាត់ស្រមោលឈឹង។
តាមសាក្សីនៅកន្លែងកើតហេតុបានឲ្យដឹងថា មុនពេលកើតហេតុគេបានឃើញយុវជនម្នាក់ជិះម៉ូតូសង់កូរ៉េ ពណ៌ក្រហម ពាក់ស្លាកលេខកំពុងចាម1B-7804 ជិះដោយយុវជនម្នាក់ ធ្វើដំណើរតាមបណ្តោយផ្លូវលេខ៤៣២ ក្នុងទិសដៅពីលិចទៅកើតដោយបំរុងឆ្លងផ្លូវព្រះមុន្នីរវង្ស ស្រាប់តែមានរថយន្តឡិចស៊ីស ពណ៌ស មិនចាំស្លាកលេខ ធ្វើដំណើរតាមបណ្តោយផ្លូវព្រះមុន្នីរវង្ស ក្នុងទិសដៅពីជើងទៅត្បូងក្នុងល្បឿនលឿនបានជ្រុលបុកម៉ូតូចំពីជំហៀងពេញទំហឹង បណ្តាលឲ្យម្ចាស់ម៉ូតូរងដួលបោកក្បាលទៅនិងថ្មលរបួសបាក់ជើងខាងឆ្វេង ចំណែកម៉ូតូរងការខូចខាតយ៉ាងដំណំ។ចំណែករថយន្តបង្កបានបើកគេចខ្លួនបាត់ស្រមោលឈឹង។
ក្រោយពេលកើតហេតុ ជនរងគ្រោះត្រូវបានរថយន្តសង្គ្រោះដឹកទៅមន្ទីរពេទ្យភ្លាមៗ ចំណែកម៉ូតូសមត្ថកិច្ចបានយកទៅរក្សាទុកនៅប៉ុស្តិ៍បឹងត្របែកបណ្តោះអាសន្ន៕
ប្រភព:yobminh
Post a Comment