ខេត្តរតនគិរី ៖ ផ្លូវមួយខ្សែនៅខាងកើតព្រលានយន្តហោះក្រុងបានលុង បានរងការខូចខាតយ៉ាងដំណំហើយនៅពេលថ្មីៗនេះខាងមន្ទីរសារធារណៈការ និង ដឹកជញ្ជូនខេត្តបានធ្វើការជួសជុលឡើងវិញរួចរាល់ហើយ ក៏ប៉ុន្តែមតិមហាជនបានធ្វើការរិះគន់ថាមន្ទីរធ្វើការជួសជុលខុសបច្ចេកទេស ដោយសារមន្ទីរបានយកដុំថ្មចាក់ពីលើជង្ហុកដោយអត់បានចាក់អ៊ុតកៅស៊ូពីលើនោះទេ ធ្វើឱ្យហុយដីប៉ះពាល់ដល់បរិស្ថាន និង សុខភាពអ្នកធ្វើដំណើរ ពេលដែលមានយានយន្តបើកបរលឿនហើយពេលខ្លះគេសង្កេតឃើញដុំថ្មបានខ្ទាតចេញពីកង់ម៉ូតូប្លោកទៅប៉ះអ្នកបើកបរ និង កញ្ចក់រថយន្តរងការខូចខាតជាញឹកញាប់ណាស់ ។
មហាជនបានលើកឡើងទៀតថា ដើមចមដែលនាំឱ្យផ្លូវរងការខូចខាតគឺដោយសារតែរថយន្តប្រភេទធុនធំ យីឌុបដឹកស៊ីម៉ង់ត៍រាប់តោនធ្វើដំណើរឆ្លងកាត់ផ្លូវខាងលើនេះរៀងរាល់ថ្ងៃ ។ ហើយពេលដែលផ្លូវរងការខូចខាតហើយនោះខាងមន្ទីរចាប់ផ្តើមធ្វើការជួសជុលឡើងវិញ ប៉ុន្តែខុសបច្ចេកទេសដោយមិនបានចាក់អ៊ុតកៅស៊ូ ធ្វើឱ្យដុំថ្មខ្ទាតប៉ះអ្នកធ្វើដំណើរបង្កគ្រោះថ្នាក់ ។
មហាជនមួយចំនួនដែលមិនពេញចិត្តនិងការជួសជុលផ្លូវមួយខ្សែខាងលើនេះបានលើកឡើងថា ខេត្តរតនគិរីគឺជាខេត្តមួយដែលមានភ្ញៀវទេសចរណ៍ជាតិ និង អន្តរជាតិបានធ្វើដំណើរមកកាន់ទីក្រុងបានលុង ប៉ុន្តែស្ថានភាពផ្លូវមានលក្ខណៈហ៊ុយទ្រលោម ដូចផ្លូវដីក្រហមតាមទីជនបទ បែបនេះអាចធ្វើឱ្យភ្ញៀវទេសចរណ៍ធ្វើការរិះគន់ជាខ្លាំង ។ ម្យ៉ាងទៀតធ្វើឱ្យបាត់បង់សោភ័ណភាពទីក្រុងស្អាតសម្រាប់ការកម្សាន្តរបស់ភ្ញៀវទេសចរណ៍ជាតិ និងអន្តរជាតិដែលធ្វើដំណើរមកកាន់ខេត្តមួយនេះ ។
Post a Comment
EmoticonClick to see the code!
To insert emoticon you must added at least one space before the code.