ហេតុការណ៍នេះ បានកើតឡើង នៅវេលាម៉ោងជាង ៩ យប់ថ្ងៃទី២២ ខែធ្នូ ឆ្នាំ២០១៤ ត្រង់ចំណុចស្តុប (ការ៉ាស់សាំងកាល់តិច )ស្ថិតក្នុងភូមិ២ សង្កាត់លេខ២ ក្រុងព្រះសីហនុ។ សមត្ថកិច្ចចរាចរ បានប្រាប់ឲ្យដឹងថា យុវជន ដែលស្លាប់ទាំង២នាក់ ទី១ឈ្មោះ កោះដៀវ អាយុ ២៩ឆ្នាំ ជាជាងសំណង់ (ជាអ្នកបើកបរ) ស្លាប់នៅនឹងកន្លែង ទី២ឈ្មោះ ពៅ អាយុ ៤៤ ឆ្នាំ ស្លាប់មុនពេលបញ្ជូនទៅជិតដល់មន្ទីរពេទ្យ។ អ្នកទាំងពីរ មានទីលំនៅក្រោយសកលវិទ្យាល័យបៀលប្រាយ ស្ថិតក្នុងភូមិ៥ សង្កាត់លេខ៤ ក្រុងព្រះសីហនុ។
នៅមុនកើតហេតុ គេឃើញជនរងគ្រោះទាំងពីរនាក់ ជិះម៉ូតូមួយគ្រឿង ម៉ាកហុងដាពណ៌ខ្មៅ ពាក់ស្លាកលេខ ព្រះសីហនុ 1D-2994 ឌុបគ្នាបើកបរក្នុងល្បឿនលឿនដូចហោះ ក្នុងទិសដៅពីលិចទៅកើត លុះបើកមកដល់ចំណុចកើតហេតុ ដែលជាផ្លូវកោង ក៏ស្រាប់តែម៉ូតូជនរងគ្រោះ បានជ្រុលទៅបុកខឿនចែកផ្លូវនៅពីរមុខយ៉ាងពេញទំហឹង បណ្ដាលឲ្យជនរងគ្រោះទាំងពីរនាក់ ខ្ទាតចេញពីម៉ូតូទៅបោកជាមួយបង្គោលភ្លើង ដែលនៅចំកណ្តាលខឿន រងរបួសយ៉ាងធ្ងន់ធ្ងរ ដោយម្នាក់ បានស្លាប់ភ្លាមៗនៅនឹងកន្លែងកើតហេតុ និងម្នាក់ទៀតបានស្លាប់ ខណៈពេលបញ្ជូន ជិតទៅដល់មន្ទីរពេទ្យចំការចេក៕
ប្រភព:vow-news
Post a Comment