ក្រុងប៉ោយប៉ែត ៖ ស្ដ្រីម្នាក់ដែលគេដឹងថា មិនមានខាន់ស្លាបានរស់នៅជាមួយបុរសបុរសម្នាក់ជាច្រើនឆ្នាំមក ហើយនោះ រហូតមានកូនស្រីទន្ទឹមខ្លួនបានវេចបង្វិចចេញពីផ្ទះមិនបានបន្សល់ទុកមូលហេតុ ។ ករណីប្រពន្ធចុះចោលប្ដីពេលដែលមានជំងឺធ្ងន់រួមជាយឪពុកចាស់ជរាដែលកំពុងឈឺធ្ងន់ដែរនោះ បានកើតឡើងនៅ យប់ ថ្ងៃទី២០ ខែធ្នូ ឆ្នាំ២០១៤ ស្ថិតក្នុង ភូមិក្បាលកោះ សង្កាត់-ក្រុងប៉ោយប៉ែត ខេត្ដបន្ទាយមានជ័យ ។
បុរសជាប្ដីមានឈ្មោះ គង់ បូឡា អាយុ៥៥ឆ្នាំ បច្ចុប្បន្នស្នាក់នៅបន្ទប់ជួល ភូមិកើតហេតុខាងលើ និងជាសមត្ថកិច្ច មួយរូបបម្រើការងារនៅក្រុងប៉ោយប៉ែត។ រីឯប្រពន្ធដែលបានចុះចោលផ្ទះទុកឱ្យប្ដី នៅកណ្ដោចកណ្ដែងទាំងមានជំងឺធ្ងន់ផង នោះឈ្មោះនីតា អាយុ៤៤ឆ្នាំ ។ បើតាមបុរសកំសត់ គង់ បូឡា អះ អាងឱ្យដឹងថា រូបគាត់និងប្រពន្ធបានរស់ នៅជាមួយគ្នាអស់រយៈពេលជិត១០ឆ្នាំ មកហើយ ដោយពុំបានរៀបអាពាហ៍ ពិពាហ៍នោះទេ ។ ការរស់នៅជាមួយគ្នា នេះមានចំណងដៃកូនស្រីម្នាក់ អាយុ៦ ឆ្នាំ រស់នៅបន្ទប់ផ្ទះជួលជារៀងរហូតមក។ នៅមុនពេលកើតហេតុគាត់បានចេញ ទៅក្រៅ ហើយពេលត្រឡប់មកវិញ ស្រាប់តែបាត់ប្រពន្ធនិងកូនស្រីពីបន្ទប់ ព្រមទាំងទ្រព្យសម្បត្ដិក្នុងបន្ទប់ ក៏ត្រូវ ប្រពន្ធប្រមូលយកទៅគ្មានសល់ រាប់ទាំង មុង ភួយ ចានឆ្នាំង កន្ទេលផង ។
មិន តែប៉ុណ្ណោះ បាននាំទាំងកូនស្រីទៅជាមួយ ផង ដោយពុំបានប្រាប់ពីមូលហេតុ ឬ តម្រុយឱ្យអ្នកជិតខាងបានដឹង សូម្បីតែ ឪពុករបស់ខ្លួនដែលមានជំងឺដេកជាប់ កន្ទេលក្នុងបន្ទប់ផ្ទះជួលនេះដែរ ។ លោក គង់ បូឡា បានបន្ដថា ក្រោយ ពីប្រពន្ធនិងកូនចុះចោល ខណៈដែលរូប គាត់កំពុងមានជំងឺធ្ងន់ត្រូវបានអ្នកភូមិ ផងរបងជាមួយ និងមានប្ដីប្រពន្ធឈ្មោះ ញ៉ឹង គ្រីម អាយុ៥៤ឆ្នាំ និងប្រពន្ធ រស់ នៅភូមិប៉ោយប៉ែត បានជួយឧបត្ថម្ភមុង ភួយ ព្រោះរដូវនេះជារដូវធ្លាក់ខ្យល់ត្រជាក់ ។ លោកបានបញ្ជាក់ថា នៅមុនពេលកើតហេតុរូបគាត់និងប្រពន្ធបានប្រកែកគ្នាបន្ដិចបន្ដួច ហើយពេលដែលគាត់ចេញទៅក្រៅនិងពេលត្រឡប់មកបន្ទប់វិញ ស្រាប់តែបាត់អីវ៉ាន់ក្នុងបន្ទប់ទាំងអស់ ឃើញតែឪពុកបង្កើតរបស់ខ្លួនដែល មានវ័យ៨៩ឆ្នាំដេកគ្រវៀនៗ និយាយស្ដីអ្វីមិនកើត ព្រោះតែជំងឺប្រចាំកាយធ្ងន់ ។
ពាក់ព័ន្ធករណីប្រពន្ធចុះចោលប្ដីនេះ អ្នកយកព័ត៌មាននគរវត្ដមិនអាចរកការពន្យល់បានទេពីភាគីស្ដ្រីជាប្រពន្ធ ថាតើការចុះចោលប្ដីពេលកំពុងមានជំងឺនិង ឪពុកក្មេកក៏មានជំងឺដែរនោះ បណ្ដាលមកពីមូលហេតុអ្វី ។ បើទោះបីជាបែបនេះក៏ដោយ បើតាមការសន្និដ្ឋានរបស់ប្រជាពលរដ្ឋនៅប៉ោយប៉ែតឱ្យដឹងថា ការចាកចេញរបស់ស្ដ្រីជាប្រពន្ធនេះ ដោយសារតែបញ្ហាជីវភាពក្នុងគ្រួសារតែប៉ុណ្ណោះ ។ ការដែលគេសន្និដ្ឋានដូច្នេះ ព្រោះឪពុកក្មេកក៏ឈឺ ប្ដីក៏ឈឺកូនក៏ពេញវ័យចូលរៀនដូច្នេះការចាកចេញរបស់ស្ដ្រីខាងលើ អាចបណ្ដាលមកពីបញ្ហាជីវភាពជួបការលំបាកតែបើរឿងរត់តាមប្រុសឈ្មោលនោះមិនអាចទៅរួចទេ ព្រោះស្ដ្រីខាងលើនេះ មានវ័យចំណាស់ ហើយការរស់នៅជាមួយប្ដីមានរយៈពេល ជិត១០ឆ្នាំមកហើយនោះ ។ ការចាកចេញរបស់ស្ដ្រីខាងលើ គឺទំរាំឈានជើងចេញពីបន្ទប់ជួល អាចនឹងបង្ហូរទឹកភ្នែកកាត់ចិត្ដពីប្ដីដែលបានរស់នៅជាមួយគ្នា និងមានអនុស្សាវរីយ៍រាប់មិនអស់ ។ ឆ្លើយតបនឹងសំណួរ អ្នកយកព័ត៌មាននគរវត្ដថាតើមានលេខទូស័ព្ទរបស់ស្ដ្រី ជាប្រពន្ធដែរឬអត់? បុរសអភ័ព្វ គង់ បូឡា បានគ្រវីក្បាលហើយនិយាយថា “ហួសចិត្ដមិនដែលប្រទះសោះ ហួស ហេតុ ហួសនិស្ស័យក្នុងលោក និយាយមិនចេញ ។
បើតាមប្រជាពន្ធរដ្ឋនៅក្រុងប៉ោយប៉ែតបានិយាយថា នៅក្នុងចំណោមមន្ដ្រីសមត្ថកិច្ចក្នុងក្រុងប៉ោយប៉ែត មានតែលោក គង់ បូឡា មួយប៉ុណ្ណោះដែលមានជីវភាពខ្សត់ខ្សោយជាងគេ ។ កន្លងទៅកាលពីលោក ហម ម៉ុត អតីតមេបញ្ជាការកងរាជអាវុធហត្ថក្រុងប៉ោយប៉ែត បានជួយឧបត្ថម្ភជាញឹកញាប់ និងនៅពេលថ្មីៗនេះ លោក ជា ដា ដែលមក ជំនួសតំណែងលោក ហម ម៉ុត ក៏បានជួយឧបត្ថម្ភយកចិត្ដទុកដាក់បន្ដផងដែរ ដូចជា ថវិកា ។ ល។ និង ។ល។ ប៉ុន្ដែបើទោះបីជាមានការជួយឧបត្ថម្ភដូច្នេះក្ដី ក៏មិនអាចយកទៅទប់ទល់ថ្លៃបន្ទប់ជួលការចំណាយហួបចុកប្រចាំថ្ងៃ ពិសេសថ្នាំសង្កូវព្យាបាលជំងឺនិងសេវាព្យាបាល។ ដូច្នេះលោក គង់ បូឡា មានតែម្រាមដៃ១០ប៉ុណ្ណោះ បានលើកប្រណមដល់សប្បុរសជនក្នុងនិងក្រៅប្រទេសក៏ដូចជា អាជ្ញាធរសង្កាត់-ក្រុង ខេត្ដបន្ទាយមានជ័យ ដែលអាចជួយផ្គត់ផ្គង់ជីវភាពរូបគាត់បាននៅគ្រាដែលកំពុងមានជំងឺទាំង រូបគាត់និងឪពុកផង ៕ ប្រភព:vow-news
Post a Comment