ខេត្តបន្ទាយមានជ័យ ៖ ក្រុមកម្មករអូសរទេះជាច្រើននាក់ បានលើកគ្នាមកតវ៉ាដោយយករទេះអូសទំនិញរបស់ខ្លួនបិទផ្លូវនៅច្រកទ្វារអន្តរជាតិប៉ោយប៉ែត (ខាងទឹកដីខ្មែរ) និងលើដងផ្លូវជាតិលេខ៥ មុខកន្លែងបត់ចូលទីលានត្រួតពិនិត្យរបស់មន្ត្រីគយ ដើម្បីមិនឱ្យធ្វើចរាចរណ៍ឆ្លងកាត់បាន ។ ក្រុមកម្មករអូសរទេះបានហៅការតវ៉ារបស់ខ្លួននេះថា ដើម្បីទាមទារ «សុំរស់» ។ ហេតុការណ៍នេះកើតឡើងកាលពីថ្ងៃទី២១ ធ្នូ តាំងពីវេលាម៉ោងជាង១១ព្រឹក ហើយរហូតដល់ម៉ោងជាង១រសៀលទើបរំសាយ ។
ក្នុងអំឡុងពេលនៃការតវ៉ានេះដែរ រថយន្តតូចធំមកពីទឹកដីថៃ ក៏ដូចជារថយន្តក្នុងទឹកដីខ្មែរ មិនអាចធ្វើចរាចរណ៍បានទេ ដោយសារការកកស្ទះនៅច្រកទ្វារអន្តរជាតិប៉ោយប៉ែត ។ ក្រុមកម្មករជាច្រើននាក់បានតវ៉ាដោយយករទេះដាក់ទទឹងផ្លូវ ហើយពួកគាត់លើកឡើងថា ក្រោយពីការបង្កើតទីលានត្រួតពិនិត្យ និងតម្រូវឱ្យរាល់រទេះអូសចូលទៅទីនោះ ដែលក្រុមមន្ត្រីអះអាងថា ដើម្បីឱ្យម្ចាស់ទំនិញចូលបំពេញកាតព្វកិច្ចពន្ធ និងអារកចូលរដ្ឋនោះ ពួកគាត់មិនមាននៅសល់អ្វីឡើយ ។ ម្យ៉ាង ការអូសរទេះចូលទីលានត្រួតពិនិត្យមានសមត្ថកិច្ចជួយធ្វើចរាចរណ៍តែនៅពេលអូសចូលបុ៉ណ្ណោះ លុះក្រោយពីត្រួតពិនិត្យហើយអូសចេញមកតាមគោលដៅវិញ ពុំមានសមត្ថកិច្ចណាជួយធ្វើចរាចរណ៍ឡើយ រហូតមានពេលខ្លះប៊ិះតែនឹងកើតគ្រោះថ្នាក់ចរាចរណ៍ទៀតផង ព្រោះតែដងផ្លូវនៅប៉ោយប៉ែតបច្ចុប្បន្នតូចចង្អៀត រថយន្តតូចធំចតគ្មានសណ្តាប់ធ្នាប់ ។
ទោះជាយ៉ាងណា ការតវ៉ាបិទផ្លូវនេះបានរំសាយវិញ បន្ទាប់ពីមន្ត្រីគយ និងរដ្ឋាករពិសេសអាជ្ញាធរក្រុងប៉ោយប៉ែតសម្រុះសម្រួល និងណែនាំពួកគាត់ឱ្យងាករកផ្លូវច្បាប់ហើយរកដំណោះស្រាយដោយសន្តិវិធីបញ្ឈប់ការតវ៉ាបិទផ្លូវ ព្រោះធ្វើឱ្យប៉ះពាល់ដល់សណ្តាប់ធ្នាប់សាធារណៈ និងការឆ្លងកាត់របស់ភ្ញៀវទេសចរបរទេស ។ ថ្វីដ្បិតតែបានរំសាយមែន បុ៉ន្តែក្រុមកម្មករបានតវ៉ាបិទផ្លូវជាលើកទី២ លើដងផ្លូវជាតិលេខ៥ មុខអតីតផ្សាររ៉ាចាស់ ជាទីលានត្រួតពិនិត្យរទេះបន្តដោយដាក់រទេះពាំងពេញផ្លូវតែម្តង ។ ថ្វីបើយ៉ាងនេះក្តី ការតវ៉ាជាលើកទី២នេះ ធ្វើឡើងតែមួយប៉ប្រិចភ្នែកបុ៉ណ្ណោះ ក៏ត្រូវអាជ្ញាធរ និងសមត្ថកិច្ចសុំឱ្យពួកគាត់នាំគ្នាទៅតវ៉ានៅទីលានត្រួតពិនិត្យរទេះវិញហើយនៅទីលានត្រួតពិនិត្យក្រុមកម្មករបានលើកឡើងដដែលដូចរៀបរាប់ខាងលើ ។
លោក ង៉ោ ម៉េងជ្រួន អភិបាលក្រុងប៉ោយប៉ែត បានណែនាំក្រុមកម្មករឱ្យបញ្ឈប់សកម្មភាពតវ៉ាតាមដងផ្លូវ ហើយនាំគ្នាជ្រើសរើសតំណាងមកជួបជាមួយអាជ្ញាធរ និងសមត្ថកិច្ច ឬមន្ត្រីជំនាញនៅទីលានត្រួតពិនិត្យ ដើម្បីបញ្ចៀសការកកស្ទះតាមផ្លូវសាធារណៈ និងហាមឃាត់ដាច់ខាតចំពោះការធ្វើបាតុកម្ម ។ លោក ឈួន ហៃ ប្រធានការិយាល័យគយ និងរដ្ឋាករច្រកទ្វារអន្តរជាតិប៉ោយប៉ែត ក្រោយពីក្រុមកម្មករតវ៉ាពីការលំបាកនេះ លោកបានបកស្រាយដោយលើកឡើងថា ខាងលោកមានការយោគយល់ច្រើនហើយសម្រាប់ប្រជាពលរដ្ឋរស់នៅតាមបន្ទាត់ព្រំដែន ប៉ុន្តែបើការអូសទំនិញពេញរទេះចេញពីដីថៃគ្រប់គ្នាចេះតែលើកហេតុផលថា ជារបស់ច្រើនម្ចាស់នោះវានឹងធ្វើឱ្យបាត់បង់ចំណូលពន្ធរដ្ឋ ។
លោកបន្តថា ទំនិញតាមរទេះបើពិតជាតិចតួច ត្រូវឱ្យម្ចាស់ទំនិញមកជាមួយដើម្បីដឹងថា ទំនិញលើរទេះជារបស់នរណាខ្លះ ព្រោះធ្វើបែបនេះវាមានភាពងាយស្រួលកុំឱ្យជនឆ្លៀតឱកាសចេះតែដឹកទំនិញគេចពន្ធតាមរូបភាពផ្សេងៗ ។ ក្រុមកម្មករបានរំសាយក្រោយពីការបកស្រាយរបស់អាជ្ញាធរ និងមន្ត្រីជំនាញនៅម៉ោងជាង១រសៀលថ្ងៃដដែល ។ មុននេះ ក្រុមកម្មករអូសរទេះបានត្អូញត្អែរថា បន្ទាប់ពីមានទីលានត្រួតពិនិត្យមក មានតែក្រុមហ៊ុនធំៗទេ ដែលនៅបន្តនាំទំនិញពីថៃមក តែបានថយចុះច្រើន ដោយសារតែការជ្រែទំនិញបានកម្រៃខ្លះត្រូវបានកាត់ផ្តាច់នាពេលនេះ ៕
Post a Comment