មន្ត្រីប្រដាប់អាវុធក្នុងខេត្តត្បូងឃ្មុំមួយចំនួនមិនបានបំពេញតួនាទីរបស់ខ្លួនក្នុងការពង្រឹងសន្តិសុខសង្គម និងការពារប្រជាពលរដ្ឋនោះទេ ផ្ទុយទៅវិញពួកគេមានមុខរបរបន្ថែមដូចជាដឹកជញ្ជូនឈើប្រណីតខុសច្បាប់ជាដើម។ ក្នុងនោះលោក រ័ត្ន ចាន់ណា ដែលពីមុនមានមុខរបរជាអ្នករត់តាក់ស៊ីនោះ បន្ទាប់មកបានធ្វើជាមន្ត្រីកងរាជអាវុធហត្ថស្នាក់ការសន្តិសុខលេខ៧០១ ដោយសារតែរកស៊ីដឹកជញ្ជូនឈើប្រណីតទទួលបានប្រាក់ចំណូលយ៉ាងច្រើនសន្ធឹកសន្ធាប់។ ឥទ្បូវនេះលោក រ័ត្ន ចាន់ណា ដែលមានទ្រព្យសម្បត្តិស្តុកស្តម្ភដោយសារជំនួញឈើប្រណីតខុសច្បាប់ បានទទួលតំណែងជាមេបញ្ជាការរងកងរាជអាវុធហត្ថខេត្តត្បូងឃ្មុំយ៉ាងត្រជាក់ចិត្ត ហើយកាន់តែមានអំណាចខ្លាំងជាងមុនទៅទៀត។
សេចក្តីរាយការណ៍ពីមន្ត្រីកងរាជអាវុធហត្ថខេត្តត្បូងឃ្មុំបានឲ្យដឹងថា ឥទ្បូវនេះលោក រ័ត្ន ចាន់ណា មិនរកស៊ីដឹកជញ្ជូនឈើដោយខ្លួនឯងដូចកាលនៅធ្វើជាមន្ត្រីកងរាជអាវុធហត្ថស្នាក់ការ៧០១ទៀតទេ។ សព្វថ្ងៃនេះលោក រ័ត្ន ចាន់ណា បានប្រើប្រាស់មនុស្សផ្សេងឲ្យរកស៊ីជំនួសគាត់ ហើយគាត់ជាអ្នកឈើពីក្រោយខ្នងចាំដោះស្រាយបញ្ហាសម្របសម្រួលជាមួយសមត្ថកិច្ចស្ថាប័នពាក់ព័ន្ធ។ មន្ត្រីកងរាជអាវុធហត្ថខេត្តត្បូងឃ្មុំបានឲ្យដឹងទៀតថា មនុស្សជំនិត២នាក់របស់លោក រ័ត្ន ចាន់ណា ដែលប្រមូលទិញឈើប្រណីតយកទៅលក់នៅស្រុកយួនយ៉ាងសកម្មនោះមានឈ្មោះ លីន និងឈ្មោះ វុធ ។ មនុស្សរបស់លោក រ័ត្ន ចាន់ណា ទាំងពីរនាក់នេះដឹកជញ្ជូនឈើទៅលក់នៅស្រុកយួនតាមច្រកដូង៧ដើម ច្រកដូនរ័ត្ន ច្រកចាន់មូល និងច្រកជាំក្រវៀន គ្មានសមត្ថកិច្ចណាប៉ះពាល់នោះទេ។
ប្រភពបានឲ្យដឹងទៀតថា លោក រ័ត្ន ចាន់ណា កំពុងតែធ្វើជាខ្នងបង្អែកឲ្យមនុស្សជំនិតរបស់ខ្លួនដឹកជញ្ជូនឈើប្រណីតយកទៅលក់នៅស្រុកយួនដោយគ្មាននរណាហ៊ានទប់ស្កាត់នោះទេ ព្រោះមានការបែងចែកផលប្រយោជន៍ដល់សមត្ថកិច្ចពាក់ព័ន្ធគ្រប់ស្ថាប័ន។ ជាពិសេសនៅច្រកទន្លេចាម ច្រកចាន់មូល និងច្រកបឹងជ្រោង កំពុងតែមានសកម្មភាពនាំឈើប្រណីតទៅលក់នៅស្រុកយួនយ៉ាងពេញបន្ទុក ព្រោះសមត្ថកិច្ចគយនិងសមត្ថកិច្ចពាក់ព័ន្ធដទៃទៀតឃុបឃិតជាមួយលោក រ័ត្ន ចាន់ណា ដើម្បីផលប្រយោជន៍ ៕
ប្រភព:yobminh
Post a Comment