ភ្នំពេញ: ក្រុមអ្នកភូមិរកា ឃុំរកា ស្រុកសង្កែ ខេត្តបាត់ដំបង ដែលធ្វើតេស្តឈាម រកឃើញថា មានផ្ទុកមេរោគអេដស៍ កំពុងរៀបចំពាក្យបណ្តឹង ដាក់ទៅកាន់តុលាការ ដើម្បីទាមទារសំណង ពីគ្រូពេទ្យភូមិ ដែលពេលនេះ កំពុងជាប់ពន្ធនាគារ។ នេះបើតាមអ្នកភូមិរកា ដែលកំពុងផ្ទុកមេរោគអេដស៍ បានឲ្យដឹង នៅព្រឹកថ្ងៃទី២៣ ខែធ្នូ។ អ្នកភូមិរូបនោះ បានអះអាងថា នៅពេលនេះ ក្រុមអ្នកភូមិ កំពុងស្រង់ស្ថិតិអ្នកដែលធ្វើតេស្តឈាម ហើយរកឃើញថា មានផ្ទុកមេរោគអេដស៍ ដើម្បីធ្វើពាក្យបណ្តឹង ដាក់ទៅកាន់តុលាការខេត្តបាត់ដំបង ទាមទារសំណងពីគ្រូពេទ្យភូមិ ដែលជាអ្នកព្យាបាលអ្នកភូមិ បណ្តាលឲ្យឆ្លងមេរោគអេដស៍។
រហូតដល់ថ្ងៃទី២៣ ខែធ្នូ ឆ្នាំ២០១៤ ក្រុមអ្នកភូមិរកា នៅតែបន្តទៅធ្វើតេស្តឈាម នៅមណ្ឌលសុខភាពឃុំរកា។ ក្នុងនោះ អ្នកភូមិ ដែលបានធ្វើចំណាកស្រុក ទៅធ្វើការនៅប្រទេសថៃ ក៏បានវិលត្រលប់ មកកាន់ផ្ទះវិញ ហើយក៏បានទៅធ្វើតេស្តឈាមជាបន្តបន្ទាប់នៅមណ្ឌលសុខភាពឃុំរកា។ អ្នកភូមិចំណាកស្រុកទាំងនោះ ក៏ធ្លាប់បានឲ្យគ្រូពេទ្យភូមិនោះ ព្យាបាល ដោយចាក់ថ្នាំផងដែរ មុននឹងចាកចេញពីស្រុកភូមិ ទៅធ្វើកម្មករចំការដំឡូង។ អ្នកភូមិចំណាកស្រុកនោះ មួយចំនួន ក៏ត្រូវបានរកឃើញថា មានផ្ទុកមេរោគអេដស៍ផងដែរ។ រហូតដល់ថ្ងៃទី២៣ ខែធ្នូ ឆ្នាំ២០១៤ ក្រុមគ្រូពេទ្យខេត្ត រួមទាំងគ្រូពេទ្យ នៅមជ្ឈមណ្ឌលជាតិប្រយុទ្ធប្រឆាំងជំងឺអេដស៍ សើស្បែក និងកាមរោគ មិនបានបង្ហាញពីតួលេខនៃអ្នកភូមិរកា ដែលបានធ្វើតេស្តឈាម មានផ្ទុកមេរោគអេដស៍នោះទេ។ ប៉ុន្តែរបាយការណ៍ចុងក្រោយពីវិទ្យស្ថាន ប៉ាស្ទ័រ ដែលជាកន្លែងពិនិត្យឈាម នៅភ្នំពេញ បង្ហាញថា អ្នកភូមិរកា ដែលធ្វើតេស្តឈាម មានផ្ទុកមេរោគអេដស៍ មានចំនួន ១៤០ នាក់ គិតត្រឹមថ្ងៃសៅរ៍ ទី២០ ខែធ្នូ ឆ្នាំ២០១៤។
សូមរម្លឹកថា បន្ទាប់ពីប៉ូលិសឃាត់ខ្លួន កាលពីថ្ងៃទី១៧ ខែធ្នូ ឆ្នាំ២០១៤ គ្រូពេទ្យនៅភូមិរកា លោក យ៉ែម ជ្រិន ត្រូវបានព្រះរាជអាជ្ញា តុលាការខេត្តបាត់ដំបង កាលពីថ្ងៃទី២២ធ្នូ បានសម្រេចចោទប្រកាន់បីបទល្មើស រួមមាន៖ ទី១-បទឃាតកម្ម អំពើឃោរឃៅ (មាត្រា ២០៥) នៃក្រមព្រហ្មទណ្ឌ ទី២-ការប្រព្រឹត្តចម្លងមេរោគដេស៍ទៅអ្នកដទៃ (មាត្រា១៨ និងមាត្រា៥០) នៃច្បាប់ស្តីពី ការបង្ការ និងការប្រយុទ្ធទប់ស្កាត់ការរីករាលដាលមេរោគអេដស៍/ជំងឺអេដស៍ និងបទល្មើសទី៣-បទធ្វើអាជីវកម្មពេទ្យ ដោយគ្មានការអនុញ្ញាត។ លោកគ្រូពេទ្យភូមិ យ៉ែម ជ្រិន ត្រូវបានគេសង្ស័យថា ជាអ្នកធ្វើឲ្យមានការឆ្លងមេរោគអេដស៍ដល់អ្នកភូមិ នៅឃុំរកា ស្រុកសង្កែ ខេត្តបាត់ដំបង។ គ្រូពេទ្យនោះ បានប្រើស៊ីរាំងរួមគ្នា ដើម្បីព្យាបាលអ្នកជំងឺ។ តុលាការ បានសម្រេចឃុំខ្លួនគ្រូពេទ្យ យ៉ែម ជ្រិន នៅពន្ធនាគារខេត្តបាត់ដំបង៕
ប្រភព:vow-news
Post a Comment